Sjećanja iz Šušnjevice (Šušnjevicę) i okolnih sela

  • < Natrag

    Kako se je radila mast, čvarci i krvavice


    Tekst Prijevod

    Slanina se pure, zdrobę se vo, pa se vo pure ân måre posuda ši neložę se foku. Ma hmo se lukra ši na gås, na plin. Šå ke se lukru žmårele dokle se tota slanina restopę, pa åri štruto. E omiri-j če ši åsteze åru råda ku slanina zebili ši ča-j hråna ćåro bura ši če-j tåre ši če åre čuda kalorije. Samo čuda de jelj nu kutegu u ime ke nu-s sâr. Dupa ča slanina, kân se jå tota skonšumę, c-råmaru osvirki, „žmårele“ noj zičęjan. Ši čale žmåre ča se tot pojdija, e åstez se ča tot ćå hitę. Jedino čire-j šegav, ča tot ân merkåt vinde. Ši ženskele fačęja čale široč budile de lu porku. Fačęja kârnåtele kåsa ku farira. Farira se pure åba ši se pure zålika farira de trukinje. Kumpara se ân butiga. De månće, ženskele smeljija kåsa ân žârnji, e åto n-åre čire, pa kumpara se ân butiga. Onda se pure zålika farira åba, se pure de čå de trukinje, pa se pure šânže de lu porku ši zåbila. Se pure štruto ši se pure žmåre ânuntru, žmåre, ši ča se tot skupa zmišę, pa se nedenę ân budila ši lęga se de amindo båndenicele. Ši čavota se pure kuhęj pre ledena åpa. Ši morešti ćåro fi atento kân ča pošnję kuhęj. Neka ča kuhę pomålo ke budila ra pukni, pa čå če-j ânuntru, ra ješi fåra. Ši čire pijažę onda puru inka ântru čå farira ši ântru čå puru ši cukar ši grozdi. Nuškarlji ši na kusićure męre neribesku, pa ši korica de lemon ali de narånče. Šå ke åru nuškare åt ukus. Ši fanj âj le trebe zebili. Fanj âj trebe pure štruto, ke se nu-s zebilite nu-s bure.

    < Natrag